INICIACIÓN Á DIRECCIÓN
INSCRICIÓN: un mail cos teus datos (NOME COMPLETO, DNI e TELÉFONO) e obradoiro no que queres participar:
DESCRICIÓN
Este curso intensivo de iniciación á dirección, impartido pola directora e guionista Lucía Estévez, está deseñado para comezar a descubrir a túa voz como cineasta.
A formación propón explorar e gozar do proceso creativo, soltando a presión do resultado final. Cada contexto social, político e cultural é diferente, por iso non hai cineastas iguais.
Debatirase sobre a industria audiovisual actual e a cabida da mirada dende dirección, tanto en proxectos propios como en proxectos por encargo. Farase unha viaxe polas fases e departamentos dunha rodaxe, para atopar a mellor forma de comunicarse co equipo artístico e co equipo técnico.
Afondarase no impulso detrás de cada proxecto audiovisual. Cada participante traerá ideas e textos propios que lle inspiren, co obxectivo de desenvolver un dossier de dirección dun proxecto persoal, que logo poida presentar a un laboratorio ou residencia artística.
Os proxectos poden ser de longametraxes, curtametraxes ou series de televisión.
PROGRAMA
• Ser director/a na industria audiovisual actual.
A mirada e o proceso creativo: por que quero contar?
• Ideas e referencias.
Un caderno de dirección para atopar un método propio.
• A historia que quero contar.
As personaxes. Reflexionar sobre a diversidade á hora de contar historias.
¿Cal é a hexemonía das historias que se contan a día de hoxe?
• Documentos de dirección:
Guion técnico e planta de cámara para planificar.
• Lecturas de guion e traballo co equipo técnico e artístico.
• A dirección de actores.
Coñecer as técnicas interpretativas para dirixir e atopar a propia.
• Laboratorios e axudas á escrita e dirección.
OBXECTIVOS ESPECÍFICOS
-
Comezar a desenvolver unha identidade cinematográfica propia e polo tanto única.
-
Explorar imaxes e referentes na busca dun universo persoal.
-
Coñecer o traballo de todos os departamentos dun equipo de rodaxe para atopar a mellor maneira de comunicar dende dirección.
-
Comprender estruturas e ritmos narrativos para rodar escenas.
-
Traballar a posta en escena con actores e logo a cinematografía dende a cámara.
-
Planificación visual e sonora.
-
Identificación das posibilidades técnicas de distintas cámaras segundo o proxecto.
-
Nocións básicas sobre estilos, xéneros e procesos de produción cinematográfica.
-
Nocións básicas de dirección de actores para atopar un método propio.
METODOLOXÍA
Sesións teórico-prácticas cun enfoque baseado na aprendizaxe activa e a reflexión persoal.
1️⃣ Desenvolvemento dun dossier de dirección a partir dunha idea persoal, co obxectivo de presentalo nun laboratorio ou residencia.
2️⃣ Elaboración dos principais documentos do departamento de dirección: guion técnico e planificación con cámara.
3️⃣ Estudo e reflexión arredor da construción de personaxes, para despois traballar a dirección de actores con criterio e sensibilidade.
DOCENTE: Lucía Estévez
Lucía Estévez é graduada en Comunicación Audiovisual pola Universidade de Vigo, cun Erasmus na Universidade Católica Portuguesa (Porto), onde afonda na creación e construción de personaxes.
O seu interese como directora céntrase no traballo actoral e no traballo de movemento en escena, explorando a relación entre corpo, emoción e cámara.
Actualmente atópase en fase de desenvolvemento da súa ópera prima As Defensas (Cósmica Producións). O proxecto participa no Programa Rueda e no Campus de Verán da Academia de Cine, ademais de formar parte do laboratorio Torino Film Lab, do SemilleruLab do Festival de Xixón —onde obtivo o Premio ao Mellor Guión—, do mercado do Festival du Nouveau Cinéma de Montreal e do programa de desenvolvemento I+P Incuba do Clúster Audiovisual Galego.
Traballa tamén como codirectora en series de televisión, entre as que destacan:
O Home perfecto (2025 – Episodios 4, 5 e 6) — CRTVG / Voz Audiovisual
Weiss e Morales (2024 – Episodio 3) — Portocabo / Nadcon / RTVE
Los argonautas y la moneda de oro (2022 – Episodios 11-20) — RTVE Clan / Portocabo
En 2021 gaña o Premio Mestre Mateo pola serie web Xan, cocreada co actor e director Miguel Canalejo.
Tamén escribe e dirixe diversas curtametraxes de ficción e documental, nas que percorre diferentes linguaxes e universos:
️ O neno sardiña (Cósmica Producións, 2023) — realismo máxico
️ O niño dos paxaros (Crecente Films, 2022) — a familia como motor creativo
Ambas estreáronse no Festival Internacional de Cine de Xixón.
Entre 2019 e 2023, forma parte da xira do Grupo Chévere coa obra Curva España, encargándose da realización audiovisual en directo.
DESTINATARIAS
A formación está dirixida a calquera persoa interesada en explorar o seu proceso
creativo e experimentar coas ferramentas que ofrece a arte do cinema.
Cancelación por parte do alumnado:
– Para cursos continuos (como ioga, pilates, coro, etc.), a cancelación debe realizarse como mínimo 15 días antes do inicio do mes seguinte. Así evitamos que se reserve unha praza para alguén que non vai continuar e podemos organizar os grupos mellor.
– A anulación do curso debe solicitarse por escrito, enviando un correo a queroaprender@escolaunitaria.com ou facéndoo presencialmente en Unitaria.
– En cursos ou obradoiros puntuais, as cancelacións poden facerse ata 15 días antes do seu inicio e devolverase o 50% do importe de inscrición.
– Unha vez comezado o curso/obradoiro/evento, non se devolverá o importe abonado, independentemente da causa de abandono.
– O prazo estimado para facer a devolución (nos casos que corresponda) será de 24 a 48 horas desde a notificación por parte de Unitaria.
Cancelación por parte de Unitaria:
Unitaria resérvase o dereito de suspender ou modificar datas e horarios de calquera curso, obradoiro ou evento se non se acada o número mínimo de persoas inscritas. Neste caso, comunicarase con antelación e indicarase a forma de devolución íntegra do importe.