FEISHOW

Un monólogo político, incómodo e moi divertido

FEISHOW é unha proposta escénica que mestura stand-up experimental, teatro, proxeccións, humor físico, música e unha boa dose de retranca para construír unha biografía tan documentada como delirante de Alberto Núñez Feijóo.

Ao longo do espectáculo conviven tres relatos que se entrelazan constantemente: a traxectoria política de Feijóo, a memoria persoal do autor medrando na Galicia das últimas décadas e unha reflexión sobre o sentido do humor político. Pode un monólogo cambiar algo? Ou, cando menos, servir como unha catarse colectiva fronte ao absurdo?

Todo isto atravesado por unha pregunta recorrente: é Feijóo un estratega maquiavélico, un incompetente absoluto… ou ambas as cousas á vez?

Sobre o espectáculo

Partindo de declaracións reais do propio Feijóo, o espectáculo percorre episodios clave da súa carreira: a súa infancia, os primeiros pasos na política, a amizade con Marcial Dorado, os anos á fronte da Xunta, a chegada ao liderado do Partido Popular e a súa proxección estatal.

Pero FEISHOW non pretende ser unha conferencia nin un mitin. É unha peza de humor político que emprega a comedia para analizar como as decisións do poder condicionan as nosas vidas e para preguntarse que papel pode ter o humor nun tempo marcado pola polarización.

Denis L. Horro

Denis L. Horro, tamén coñecido como Denny Horror, é cómico de stand-up e guionista.

Gravou dez monólogos para Comedy Central e participou en programas como La Resistencia, Sopa de Gansos ou ¿Y si sí?. Como guionista traballou en formatos como LocoMundo, os especiais de Fin de Ano de José Mota, Battle Roast ou La Resistencia, entre outros.

Na actualidade escribe para Vaya Semanita (ETB) e colabora con medios como CTXT e O Salto, ademais de formar parte do colectivo galego de humor político Non Saímos do Lixo.

Traxectoria

Estreado no Teatro del Barrio de Madrid en setembro de 2025, FEISHOW continúa en cartel e tamén pasou por festivais como LlamaFest de Barcelona.

A crítica destacou a súa combinación de humor, documentación e experimentación escénica, converténdoo nunha das propostas máis singulares da comedia política actual.

Información práctica

Duración: 70 minutos aproximadamente.
Idioma: Galego.
Público: Adulto.